Endurnýjun skipaflota

Annar ísfisktogarinn af þremur, sem smíðaður var í Tyrklandi, Akurey AK, fór í sína fyrstu veiðiferð í byrjun árs eftir að millidekkið var innréttað og sjálfvirkt lestarkerfi var sett í skipið. Um mitt ár fór þriðji og síðasti ísfisktogarinn, Viðey RE, í sína fyrstu veiðiferð og gekk allt að óskum.

Reynsla er nú komin á "systurnar þrjár", eins og nýju ísfiskskipin eru kölluð. Skip og búnaður hafa staðið undir væntingum og með tilkomu þessara nýju skipa þá hefur HB Grandi tekið stórt skref inn í framtíðina.

Ísfisktogarinn Sturlaugur H. Böðvarsson AK kom í byrjun árs úr sinni síðustu veiðiferð. Þar með lýkur farsælum ferli þessa aflamikla skips undir merkjum HB Granda.

Á miðju ári kom Ottó N. Þorláksson RE úr sinni síðustu veiðiferð fyrir HB Granda. Ísfélagið í Vestmannaeyjum hefur keypt Ottó og mun skipið halda nafni sínu áfram hjá nýjum eigendum.

Í byrjun árs hófst daglegt eftirlit starfsmanna HB Granda með nýsmíði frystitogarans á Spáni og mun það standa út smíðatímann. Eftirlitinu er ætlað að fara yfir ýmsa hluti sem varða smíðavinnuna og taka reglulega út stöðuna á verkinu.

Síðari hluta árs var gengið frá kaupum á öllu hlutafé í Ögurvík ehf. en félagið gerir út Vigra RE, 2.157 tonna frystitogara sem er smíðaður í Noregi 1992. Vigri RE er eitt kvótahæsta fiskiskip íslenska fiskiskipaflotans, með 7.680 tonn af botnfiski og 1.663 tonn af makríl, á yfirstandandi fiskveiðiári.